အထည်ချုပ်လုပ်ငန်းများက အလုပ်သမားအခွင့်အရေးများ ပိုမိုချိုးဖောက်နေဟုဆို

မြန်မာနိုင်ငံရှိစက်မှုဇုန်များမှ စက်ရုံ အလုပ်ရုံများအနက်အထည်ချုပ်စက်ရုံ များသည်အလုပ်သမားအခွင့်အရေးကို ပိုမိုချိုးဖောက်နေကြောင်း “အနိမ့်ဆုံးကို မြှင့်တင်ပေးခြင်း” အမည်ရှိ မြန်မာနိုင်ငံ အထည်ချုပ်လုပ်ငန်းအခြေအနေအစီရင် ခံစာအရ ဒီဇင်ဘာ ၂ ရက်တွင် သိရ သည်။

လက်ရှိတွင် အနိမ်ဆုံးလုပ်ခလစာ သတ်မှတ်ပေးထားသော်လည်း အချို့သောအလုပ်သမားများသည်လုပ် ခလစာအပြည့်အ၀မရရှိခြင်း၊ အချိန်ပို ကြေးအပြည့်အ၀မရရှိခြင်းအပါအ၀င် တစ်နေ့အလုပ်ချိန်ပုံမှန် ၈ နာရီထက် ကျော်လွန်ကာခိုင်းစေခြင်းများဖြစ်ပေါ်နေ ကြောင်း အဆိုပါအစီရင်ခံစာထုတ်ပြန် ခဲ့သည့်ရှေ့ပြေးအသံအဖွဲ့မှယာယီ တာဝန်ခံကိုအောင်ခိုင်မင်းကပြောသည်။

“ဥပဒေပိုင်းဆိုင်ရာပြုပြင်ပြောင်းလဲ မှုတွေ အလုပ်သမားတွေရဲ့ အခွင့်အရေး ကို မြှင့်ပေးနိုင်ဖို့၊ကာကွယ်ပေးနိုင်ဖို့ဥပဒေ ပြဋ္ဌာန်းထားတာတွေရှိတယ်။ ဒါပေမဲ့ အလုပ်ရှင်တွေရဲ့လက်တစ်လုံးကြားလုပ် ခြင်းကိုခံနေရတယ်။ ခေါင်းပုံဖြတ်နေတာ ကိုခံနေရတယ်။ အဲဒါတွေကို ကာကွယ် ပေးနိုင်မယ့်ဥပဒေမျိုးတွေကို ပြဋ္ဌာန်းလာ ဖို့အတွက် ကျွန်တော်တို့ဒီအစီရင်ခံစာက အထောက်အကူပြုမယ်လို့ယုံကြည်ပါ တယ်”ဟု ရှေးပြေးအသံအဖွဲ့မှကိုအောင် ခိုင်မင်းကဆိုသည်။

အနိမ်ဆုံးလုပ်ခလစာ အစိုးရ မှသက်မှတ်ပေးခဲ့သည်မှာ တစ်နှစ်ကျော် ခဲ့ပြီဖြစ်ပြီး ယင်းသို့တိုးမြှင့်ပေးခြင်း၏ အကြိုးဆက်အဖြစ်အလုပ်ရှင်များကဒဏ် ကြေးများပိုမိုသတ်မှတ်ခြင်း၊ အချိန်ပိုကြေး လျှော့ချသတ်မှတ်ခြင်း၊ ဖိအားပေးခိုင်းစေ ခြင်းအပါအ၀င်အခြားသောလုပ်ငန်းခွင် ခံစားခွင့်များသားပိုမိုဆုံးရှုံးလာစေကြောင်း အလုပ်သမားလှုပ်ရှားမှုအဖွဲ့မှကိုသူရိန် အောင်ကပြောသည်။

“အနည်းဆုံးအခကြေးငွေမူဝါဒကျင့် သုံးတာကအလုပ်သမားလှုပ်ရှားမှုတွေရဲ့ အောင်မြင်မှုတစ်ခုဖြစ်ပေမယ့် အလုပ် သမား အများအပြား အတွက်ကတော့ လုပ်ငန်းခွင်အခြေအနေတွေ ဆုတ်ယုတ် လာတယ်။  ဘာလို့လဲဆိုတော့ သူတို့ က ပိုမြင့်လာတဲ့ ကုန်ထုတ်လုပ်ရေးရည် မှန်းချက်တွေပြည့်မီအောင်အခိုင်းခံရပြီး ဖိအားဒဏ်ခံရတာတွေများများလာတယ်” ဟု ကိုသူရိန်အောင်ကဆိုသည်။

အနိမ့်ဆုံးကိုမြှင့်တင်ပေးခြင်း မြန်မာ နိုင်ငံအထည်ချုပ်လုပ်ငန်းအခြေအနေ အစီရင်ခံစာအား မြန်မာနိုင်ငံရှိစက်မှုဇုန် ၁၄ ရှိအထည်ချုပ်စက်ရုံ ၆၄ ရုံရှိအလုပ် သမားများအပါအ၀င်အလုပ်သမားသမဂ်္ဂ၊ ပုဂ္ဂလိကလုပ်ငန်းရှင်များ၊အလုပ်သမား  အခွင့်အရေးတက်ကြွလှုပ်ရှားသူများ၂၀၀ ကျော်နှင့် တွေ့ဆုံမေးမြန်းကာအစီရင်ခံ စာအားထုတ်ပြန်ခြင်းဖြစ်ကြောင်း သိရ သည်။                       

ဖြိုးအောင်

Date: 
Tuesday, December 6, 2016