စာမေးပွဲနီးလာပြီ ဖိဖိစီးစီးသင်ကြားပေးကြပါ

ယနေ့ စာရေးသူတို့၏ ပြည်ထောင်စု သမ္မတနိုင်ငံ သည် ဒီမိုကရေစီ နိုင်ငံတော်သို့ ဦးတည်ချီတက်နေ ပြီဖြစ်သောအချိန်အခါဖြစ်သည်။နိုင်ငံတော် ဖွံ့ဖြိုးတိုး တက်ရေးတွင် အခြေခံကျသော အမျိုးသား ပညာရည် မြင့်မားရေး စီမံကိန်းကို ရေးဆွဲအကောင်အထည် ဖော် ဆောင်ရွက်လျက်ရှိသကဲ့သို့ လူမှုရေး၊ စီးပွားရေး၊ ဘ၀ဖွံ့ဖြိုးမှု ပုံစံဖြင့် ဘက်စုံထောင့်စုံ ကြိုးပမ်းဆောင် ရွက်နေသည့် အချိန်ကာလဖြစ်သည်။

ဤသို့သော အချိန်အခါမျိုးတွင် လွန်ခဲ့သော ကာလများက နိုင်ငံတော် သမ်္မတဟောင်း ဦးသိန်းစိန် က ပညာရေးဆိုင်ရာ မူဝါဒ လမ်းညွှန်ချက်များ မိန့် ကြားခဲ့သည်ကို အစဉ်အမြဲ သတိတရ ရှိနေမိသည်။

ထိုလမ်းညွှန်ချက်များအနက်-

မျိုးဆက်သစ် လူ့စွမ်းအား အရင်းအမြစ်များ အား အသိပညာရှင်၊ အတတ်ပညာရှင်များအဖြစ် လေ့ကျင့်မွေးထုတ်ပေးရေး၊

အဆင့်မြင့်ပညာနှင့် အခြေခံပညာ ဆရာ၊ ဆရာမများ၏ သင်ကြားမှု အရည်အသွေး မြင့်မား ရေး၊

ပညာရေး ၀န်ထမ်းများ၏ ပညာအရည်အချင်း နှင့် လူမှုစီးပွားရေး အဆင့်အတန်း မြင့်မားရေး၊

နိုင်ငံတကာ အဆင့်မီ ပညာရည်မြင့်မားရေး၊

ဆိုသည့် အချက်များသည် ဆရာ၊ ဆရာမများ နှင့် သက်ဆိုင်သည့် တာဝန်များ ဖြစ်ပါသည်။ ထို့ ကြောင့် ပညာရေးဝန်ထမ်း ဆရာ၊ ဆရာမများသည် ထိုတာဝန်များကို အမြဲတစေ သတိရလျက် မိမိတို့ ရင်းနှီးထားကြသည့် ၀ါသနာ၊ စေတနာ၊ အနစ်နာ (မေတ္တာ၊ အကြင်နာ၊ ကရုဏာ) စွမ်းအားတို့ဖြင့် နိုင်ငံ မျိုးဆက်သစ် သားငယ်၊ သမီးငယ်များကို အရည်အသွေး ပြည့်ဝသော အသိပညာရှင်များ ဖြစ်လာကြစေရန်အတွက် လေ့ကျင့် သင်ကြားပေးရ မည်ဖြစ်ပါသည်။ မိမိတို့၏ တပည့်များအား အရည် အသွေးပြည့်ဝသော သားကောင်း၊ သမီးကောင်း ရတနာလေးများ ဖြစ်လာကြစေရေးအတွက် မိမိ တို့ကိုယ်တိုင် အရည်အသွေးမြင့်မားအောင် ကြိုးပမ်း အားထုတ်၊ သင်ကြားပို့ချ ပေးကြရမည်ဖြစ်ပါသည်။

အလျဉ်းသင့်၍ ကျေးဇူးတော်ရှင် ဓမ်္မကထိက ဆရာတော်၊ ဓမ္မဘေရီ အရှင်ဝီရိယ (တောင်စွန်း) ဟောကြေားတော်မူခဲ့သော ““အရိပ်နှင့် ခရီးသွားသူ များ”” တရားတော်ကို အမှတ်ရမိ၍ တင်ပြလိုပါ သည်။

လောကတွင် -

(က)    သစ်ရိပ်၊ ၀ါးရိပ်

(ခ)     ဆွေရိပ်မျိုးရိပ်၊

(ဂ)     မိဘရိပ်၊

(ဃ)    ဆရာရိပ်၊

(င)     မင်းရိပ်၊

(စ)     ဗုဒ္ဓဓမ္မရိပ်ဟူ၍ အရိပ် ၆ မျိုးရှိကြောင်း ပူပြင်းသည့် နေပူဒဏ်ကို သစ်ရိပ်၊ ၀ါးရိပ်တို့က ကာကွယ်ပေး၍ အေးမြစေပါသည်။ ထိုသစ်ရိပ်၊ ၀ါးရိပ်ထက် ဆွေမျိုးတို့၏ အရိပ်က ပို၍အေးမြစေ သည်။ ဆွေမျိုးရိပ်ထက် မိဘရိပ်က ပို၍ အေးမြစေ ပြီး မိဘရိပ်ထက် ဆရာရိပ်က ပို၍အေးမြစေသည် ဟု ရှင်းလင်းဟောကြားတော်မူခဲ့သည်။ ထိုသို့ ဟော ကြားတော်မူရင်း တရားနာပရိသတ်အား လောက တွင် လူတို့သည် တစ်ကြိမ်တစ်ခါ မွေးရုံဖြင့် လူမပီ သသေးကြောင်း၊ နှစ်ကြိမ်မြောက် မွေးဖွားပြီးမှသာ လူပီသလာကြောင်း ဟောပြောသောအခါ တရားနာ ပရိသတ်မှ နားမလည်ဖြစ်သွားသည်။

ပထမ မွေးဖွားပေးသူမှာ ၀မ်းနှင့်လွယ်၍ မွေးဖွားပေးသော မိခင်ဖြစ်ပြီး ““ဒုတိယမွေးဖွားပေး သူမှာ မည်သူပါနည်း”” ဟု တရားနာ ပရိသတ်များ သို့ အမေး၊ ပုစ္ဆာထုတ်ပါသည်။ ထိုအခါ အငြိမ်းစား ယူခဲ့သော မူလတန်းကျောင်းအုပ်ဆရာကြီး တစ်ဦး က-

““ဒုတိယ မွေးဖွားပေးသူမှာ နှလုံးသားနှင့်လွယ် ၍ အာခံတွင်းမှ မွေးဖွားပေးရသော ဆရာ၊ ဆရာမ များဖြစ်ပါသည်ဘုရား”” ဟု ဖြေကြားလျှောက်တင် ပါသည်။ တပည့်များစွာတို့၏ ဆရာ၊ ဆရာမတို့၏ ဆုံးမပဲ့ပြင် သွန်သင်ပေးမှုကြောင့် မြင့်မြတ်သော ဘ၀များသို့ ရောက်ရှိနိုင်ကြသဖြင့် မိဘအရိပ်ထက် ဆရာ့ အရိပ်ကပို၍ အေးမြကြောင်း ဆရာတော်က ရှင်းပြတော်မူပါသည်။

ပြည်ထောင်စု သမ္မတမြန်မာနိုင်ငံတွင် ကျောင်း သူကျောင်းသားများသည် ဆရာ၊ ဆရာမတို့အား မြန်မာ့ယဉ်ကျေးမှု အစဉ်အလာနှင့်အညီ အနန်္တဂိုဏ်း ၀င် ကျေးဇူးရှင်များအဖြစ် နှစ်စဉ်ပူဇော်ကန်တော့ ကြသကဲ့သို့ အငြိမ်းစားယူပြီးကြသည့် သက်ရှိထင် ရှား ဆရာ၊ ဆရာမကြီးများကိုလည်း တပည့်ဟောင်း များက နှစ်စဉ်ပူဇော်ကန်တော့ကြသည်မှာ အလွန် ပင် အားရကျေနပ်ဖွယ်ရာ ဖြစ်ပါသည်။

နိုင်ငံတကာမှ ပညာရှင်များကလည်း ဆရာသည် နိုင်ငံချစ်စိတ်၊ မျိုးချစ်စိတ်ရှိသူ၊ ဆရာတပည့်တို့၏ ဘ၀ကို ဖန်တီးပြုပြင်သူ၊ ဆရာသည် ထွန်းတောက် သည့် လူသားမျိုးနွယ်သစ်ကိုတည်ဆောက်သူ၊ ဆရာ သည် လူသားဥယျာဉ်မှူး၊ ဆရာသည် အကြီးကျယ် ဆုံးသော ဗိသုကာပညာရှင်ဖြစ်သည် စသည်ဖြင့် ဂုဏ်ပြုဖွင့်ဆိုထားသည်ကို တွေ့ရသည်။

မြန်မာ့လူ့ဘောင်တွင် ဆရာ၊ ဆရာမများသည် မြင့်မြတ်သော ဘ၀ကို ပိုင်ဆိုင်ထားကြပြီး မြင့်မြတ် သော တာဝန်ဝတ္တရားများကို ထမ်းဆောင်နေကြသူ များ ဖြစ်ပါသည်။ ထို့ကြောင့် အနန္တဂိုဏ်းဝင် ကျေးဇူးရှင်များဖြစ်ကြသော ဆရာ၊ ဆရာမများသည် ခေတ်မီ တိုးတက်သည့် ဒီမိုကရေစီ နိုင်ငံတော်ကြီး ပေါ်ထွန်းလာရေးအတွက် နိုင်ငံတော်၏ ပညာရေး ဆိုင်ရာ မူဝါဒ လမ်းညွှန်ချက်များနှင့်အညီ နိုင်ငံ့ မျိုးဆက်သစ် လူ့စွမ်းအား အရင်းအမြစ်များအား စွမ်းရည်ပြည့်ဝသည့် အသိပညာရှင်၊ အတတ်ပညာ ရှင်များအဖြစ် လေ့ကျင့်သင်ကြားပေးကြရန်နှင့် ယခုအခါ စာမေးပွဲအသီးသီး (မူလတန်း၊ အလယ် တန်း၊ အထက်တန်း) ကို ဖြေဆိုကြတော့မည့် ကျောင်းသူ၊ ကျောင်းသားများအား ဖိဖိစီးစီး သင်ကြားပေးကြပါရန်  တိုက်တွန်းအပ်ပါသည်။

 

မြင့်မြတ်ကြည်